Gjatë darkës zyrtare me rastin e 110 vjetorit të Gazetës Dielli, Federata Panshqiptare e Amerikës VATRA dhe Gazeta DIELLIi nderuan Z. Harry Bajraktari me “Mirënjohjen e Lartë të Vatrës”, titulli më i lartë që Federata jep për personalitete të spikatura.
Z. Harry Bajraktari është një nga mbështetësit më të shquar të Federatës sonë ndër vite. Kontributi i Tij përmbledh një sërë fushash të jetës së komunitetit shqiptar jo vetëm në Amerikë. Nën shembullin e Gazetës Dielli, Z. Bajraktari themeloi Gazetën Illyria, një organ me peshë në informimin e shqiptaro – amerikanëve dhe më gjerë. Ndihma, kontributi dhe prania e Tij thelbësore në një sërë drejtimesh, ku mund të përmendim: çështjen e Kosovës, demokratizimin e Shqipërisë, kulturën dhe gazetarinë, ruajtjen e traditave dhe forcimin e rolit të grave në komunitet, mbështetjen për ruajtjen e historisë sonë në marëdhëniet e shkëlqyera me komunitetin hebre, etj ishin dhe mbeten disa nga arsyet që Federata Panshqiptare e Amerikës VATRA dhe Gazeta DIELLI e nderuan me Mirenjohjen e Lartë të Vatrës.